Ифтихор

Рио- Де-Жанейро шахрида бўлиб ўтган XV ёзги паралимпия ўйинлари ғолиби бўлган ўзбек спортчиларига.

Сизга таҳсин бўлсин, сизга тасанно,

Сизга олқиш бўлсин, сизга салламно,

Сиздай жасурларга бизлар жонфидо,

Мардлик майдонида мардона парвоз –

Буюк Ўзбекистон фарзандига хос.

 

Ўттиз бир медални қўлга киритган,

Ватан байроғини жонида тутган,

Қалби нопокларнинг шўрин қуритган

Мардлик майдонида мардона парвоз –

Буюк Ўзбекистон фарзандига хос.

 

 Мажруҳ дея кўрманг, улар мукаммал,

Баъзи соғломлардан минг бора афзал,

Улар ибрат эрур азрўзи азал

Мардлик майдонида мардона парвоз —

Буюк Ўзбекистон фарзандига хос.

 

Тўрт муччаси соғлом бўлган эй одам,

Улар-ла фахрлан, фикр қил бир дам,

Сен ҳам қалбингга боқ, қалбингга сен ҳам.

Мардлик майдонида мардона парвоз –

Буюк Ўзбекистон фарзандига хос.

 

Жисми-жони бардам, юраги сўқир,

Ҳасад босган ёвуз тилаги сўқир

Сира биздан эмас, бизлар эркин, ҳур,

Мардлик майдонида мардона парвоз –

Буюк Ўзбекистон фарзандига хос.

 

Билиб кўйсин дунё, бизлар ким эдик,

Тўмарис, Темурбек зотимиз дедик,

Жахон совриндори бугун биз бўлдик,

Мардлик майдонида мардона парвоз –

Буюк Ўзбекистон фарзандига хос.

 

Калб кўзи уйғоқлар бизнинг наслимиз,

Юртбоши аслидан бизнинг аслимиз,

Жаҳонни забт этди ёшлик фаслимиз,

Мардлик майдонида мардона парвоз –

Буюк Ўзбекистон фарзандига хос.

 

Ўргилиб кетайин, ўғил-қизларим,

Сизлар сабаб ёруғ бўлди юзларим.

Хамиша сизга шу айтар сўзларим:

Мардлик майдонида мардона парвоз –

Буюк Ўзбекистон фарзандига хос.

Малика МИРЗО қизи